GURINDAM SILEK BASAMBUANG
PANDEKA HARIMAU AGAM.
Epsode :Tuah Pikek Harimau Bag 1
**************
sapasang gunuang tinggi manjulang
manyapu awan dilangik tinggi
gunuang marapi jo singgalang
manjago ranah jo nagari

marapi tagak manjulang gagah
asok kapundan tinggi mambubuang
kasiah singgalang indak tasanggah
umpamo cinto si bundo kanduang

rono rancak gunuang singgalang
talago dewi ba ayia dalam
jadi pilihan dek petualang
pusat tujuan pancinto alam

Sabtu malam pukua sambilan
ramilah pasa di koto baru
mudo mudo lah badatangan
dari arah ranah pinjuru

Mahasiswa di kota padang
atau pun juo nan dari lua
punyo hobby bapetualang
dimalam nan ko ndak namuah tingga

tampak sarombong urang bajalan
senter di tangan mangkilek kilek
manuju titiak permulaan
sampai di kampuang pandai sikek

ampek jantan duo padusi
jaleh jo tampak bahati riang
kadang tadanga dendang jo nyanyi
ma usia dingin tibo katulang

walau barek baban di pungguang
mambaok ransel jo perbekalan
indak karusuah badan tangguang
jo sanang hati lanjuik bajalan

Tasabuik Dagang Banamo Agam.
pemuda asli Rang Ampek angkek
jadi ketua di nan baranam
panunjuak jalan santano sasek

gunuang marapi nan jo singgalang
indak tahituang kali di tampuah
sajak ketek lah bapelualang
cinto ka alam basungguah sungguah

samanjak ayah mandeh tiado
Agam di asuah dek mamak kanduang
kampuang banamo Baringin koto
iliran sarasah dilereng gunuang

Laweh tabantang parak tabu
tumbuah di ranah pandai sikek
tower pamancar ado disitu
titiak bamulo urang barangkek

Hari rancak langik babintang
bulan mancigok di baliak awan
sambuiklah kami gunuang singgalang
bimbiang lah sampai ka tujuan

cubo di jajak si jalan baru
lapeh dari urang nan rami
dari salatan koto baru
oo pandai sikek doakan kami

Rimbo pimpiang suok kida
cando gerai tirai kulambu
kadang mandaki kadang mandata
akhianyo sampai dilereang batu

di sawuak ayia mamakai boto
mato ayia janiah barasiah
untuak baka nan kadibao
pahilang hawuih palarai latiah

balanjuik kini parjalanan
mandaki cadas ba hutan labek
udaro dingin indak tatahan
ambun di daun nampak mangkilek

limo jam sudah parjalanan
indak paduli latiah jo litak
asa kan sampai niat tujuan
tajajak kaki sampai ka puncak

banyak tumbuhan bantuak bajangguik
disalo Cadas bawarna kuniang
raso ka guyah sandinyo lutuik
manampuah curam jo terjal tabiang

sambia mangumpua baliak tanago
di bukak bantuak perbekalan
Lilin parapin kini manyalo
ma abuih ayia atau mie instan

dilapeh pandang sabalah kiri
bukiktinggi pun nampak tarang
cahayo silau bak cando tali
manyambuang sampai kapadang panjang

gunuang marapi jaleh di muko
danau singkarak bariak tanang
alah takumpua baliak tanago
jalan ka puncak kini di jalang

kabuik manutuik lah mulo taba
cahayo senter nandi radamnyo
santano badan kurang waspada
lurah jo jurang mamintak nyao

hamparan batu taba dek lumuik
bamacam paku tumbuah disinan
bialah jalan ba si insuik
asa salamaik sampai tujuan..

ambun kabuik sabana taba
tandonyo puncak samakin dakek
saabih dayo baa kaba a
tatap di tampuah bagulambek

Agam bajalan paliang di muko
Rizal mamacik senter nan tarang
Diah,Nilam sarato Rido
agak tatingga di bulakang

sadang mandaki cadas terjal
kaki manapak di nan landai
sontak tadanga pakiak Rizal.
dagang ruponyo lah tagarajai

tapijak cadas di lereang tabiang
runtuahlah batu nan dipijaknyo
rizal tajatuah baguliang guliang
dihadang lurah dalam manganggo

Agam bagageh kabawah baliak
kawan nan lain alah disitu
Rizal nampak manggapai naiak
tangan bapacik ka urek kayu

Agam kaluakan tali tambang
ujuang di kabek ka tunggua kayu
ujuang nan ciek kabek ka pinggang
mulai turuni lurah babatu

Rizal tampak takuik jo panik
sambia manyorak mamintak tolong
santano lapeh tangan bapacik
kadasar lurah badan bagolong

satapak Agam turun kabawah
tangan mamacik urek jo rumpuik
sapuluah meter turunlah sudah
dirantiang mano rizal tasangkuik

tali di ulua kabakeh rizal
rizal manjambo sambia manggigia
sambia basanda di lereang terjal
pinggang patah raso takilia

antah malang siratak tangan
antah kok indak kueknyo tali
baduo baban di tangguangkan
putuihlah tali gantuangan diri

Agam jo Rizal jatuah kabawah
kadang mahantam cadas nan tajam
antah sabara dalamnyo lurah
jadi misteri ditangah malam

tadanga pakiak kawan di ateh
bacampua tangih maramuak radam
samakin lamo makin ndak jaleh
pandangan mato baransua buram

dilurah mano manuai malang
dirimbo mano ratok babisiak
sakiro ado umua nan panjang
lanjuik curito disambuang baliak...........

bERSAMBUNG...
(Yovi Ottera)